राष्ट्रिय स्वतन्त्र पार्टी (रास्वपा) को मधेश प्रदेशभर चलिरहेको संगठन निर्माण तथा जिल्ला अधिवेशन प्रक्रिया विवाद, झडप र असन्तुष्टिका घटनाले प्रभावित बन्न थालेको छ। सिरहादेखि धनुषा, महोत्तरी, रौतहट, बारा, सर्लाही र पर्सासम्म अधिवेशनका क्रममा नेतृत्व चयनलाई लिएर विवाद चर्किएको देखिएको छ।
सबैभन्दा पछिल्लो घटना सिरहामा भएको जिल्ला अधिवेशनमा देखियो, जहाँ नेतृत्व चयनको विषयमा दुई पक्षबीच झडप हुँदा र्यापिड एक्सन टिमका जिल्ला प्रमुख दिनेश थापासहित केही नेता–कार्यकर्ता घाइते भएका छन्। घटनापछि केन्द्रीय निर्वाचन आयोगले अधिवेशन मंगलबार बिहानसम्मका लागि स्थगित गरेको छ।
सिरहामा सर्वसम्मति कि निर्वाचन ?
सिरहा जिल्ला सभापतिका लागि सुभाष यादव, रामसोगारथ यादव र वर्तमान सभापति हरि मैनाली आकांक्षी छन्। रामसोगारथ पक्षले सर्वसम्मत नेतृत्व चयनको माग गरिरहेको छ भने अन्य पक्षले लोकतान्त्रिक प्रतिस्पर्धामार्फत नेतृत्व चयन हुनुपर्ने अडान राखेका छन्। यही विषयले विवाद बढ्दै झडपको रूप लिएको बताइएको छ।
स्थानीय नेताहरूका अनुसार केही सांसदहरूले आफू निकट व्यक्तिलाई नेतृत्वमा ल्याउने प्रयास गरेपछि विवाद थप चर्किएको हो।
महोत्तरी र धनुषामा पनि विवाद
महोत्तरीमा अधिवेशनको बन्द सत्रमै विवाद भएपछि प्रक्रिया अनिश्चितकालका लागि रोकिएको छ। तदर्थ समितिका अध्यक्षमाथि केन्द्रले कारबाही गरेपछि दुई पक्षबीच तीव्र मतभेद देखिएको थियो।
धनुषामा त झन् एउटै पालिकामा दुई अलग-अलग अधिवेशन सम्पन्न भएका घटनासमेत सार्वजनिक भएका छन्। गणेशमान चारनाथ नगरपालिकामा फरक–फरक मितिमा दुई समूहले छुट्टाछुट्टै समिति गठन गरेपछि विवाद केन्द्रीय निर्वाचन आयोगसम्म पुगेको छ। जनकपुरधाम उपमहानगरपालिकामा समेत उजुरी परेपछि पुनः निर्वाचन गराउनुपरेको थियो।
विवादित पालिकालाई बाहिर राखेर जिल्ला अधिवेशन
सिरहामा १७ मध्ये १५ पालिकाका प्रतिनिधिलाई मात्र जिल्ला अधिवेशनमा सहभागी गराइएको छ। भगवानपुर र नवराजपुर गाउँपालिकामा पहिलेदेखिको विवादका कारण ती पालिकालाई प्रक्रिया बाहिर राखिएको बताइएको छ।
यस्तै धनुषामा पनि तीन पालिकाको अधिवेशन सम्पन्न नभई जिल्ला अधिवेशनको तयारी गरिएको छ, जसले थप प्रश्न उठाएको छ।
रौतहट, बारा र सर्लाहीमा पनि असन्तुष्टि
रौतहटमा प्रतिनिधि छनोटलाई लिएर विवाद भएपछि जिल्ला अधिवेशन अन्तिम समयमा स्थगित गरिएको छ। बारामा पूर्व जिल्ला सभापति चन्दन स्वर्णकारमाथिको कारबाहीपछि संगठनभित्र ध्रुवीकरण बढेको थियो। सर्लाहीमा भने प्रतिनिधिको सूचीमै विवाद भएपछि अधिवेशन अन्योलमा परेको छ।
पर्सामा पनि जिल्ला नेतृत्व चयनका क्रममा दुई पक्षबीच प्रतिस्पर्धा तीव्र बनेको छ।
सांसदहरूको हस्तक्षेपले बढ्यो विवाद ?
रास्वपाले सांसदहरूलाई अधिवेशन प्रक्रियामा प्रत्यक्ष हस्तक्षेप नगर्न निर्देशन दिए पनि स्थानीय तहसम्म कतिपय सांसदहरू आफ्ना निकटका उम्मेदवारलाई जिताउन सक्रिय भएको आरोप लागिरहेको छ। पार्टीका केही नेताहरूले समेत यसलाई विवादको प्रमुख कारणका रूपमा स्वीकार गरेका छन्।
मधेश प्रदेशका महामन्त्री मनिषकुमार साहका अनुसार निर्वाचनका बेला स्थानीय नेता–कार्यकर्तासँग गरिएका प्रतिबद्धताले अहिले नेतृत्व चयनमा दबाब सिर्जना गरिरहेको छ।
किन बढ्दैछ विवाद ?
गत प्रतिनिधिसभा निर्वाचनमा मधेश प्रदेशमा रास्वपाले अप्रत्याशित सफलता हासिल गरेपछि पार्टीभित्र नेतृत्व र अवसरको प्रतिस्पर्धा तीव्र बनेको विश्लेषण गरिएको छ। आगामी स्थानीय तह तथा प्रदेशसभा निर्वाचनलाई लक्षित गर्दै नेता–कार्यकर्ताहरू संगठनभित्र आफ्नो प्रभाव बढाउन सक्रिय देखिएका छन्।
पार्टीभित्र बढ्दो महत्त्वाकांक्षा, टिकटको सम्भावना, संगठन विस्तारको प्रतिस्पर्धा तथा निर्वाचन सम्बन्धी निर्णय प्रक्रियामा समन्वय अभावका कारण मधेशका अधिकांश जिल्लामा अधिवेशन विवादित बन्न थालेको नेताहरूको भनाइ छ। #news #rsp
